غيرت باقتي إلى زيرو بلس..ابي اعرف كيف تنزل تسعيرة الفاتوره ؟

[%ملكة الأنوثة%,]

السلام عليكم ورحمة الله..

انا غيرت الباقه إلى زيرو بلس
بس علي مبالغ غير مفوتره ....نقول مثلا 500 ريال ....وحولت الباقه إلى زيرو بلس ..اللي هي كل شهرين 700 ريال ..

كيف تنزل

هل يعني ..انا يصير عندي رصيد 700 ريال ..اكلم فيه قد ما ابي .....صح كذا ....

ولا كيف ...
تكفوون ابي شرح سهل


يا ليت حد يرد ..من جد ..من الساعه 11 وانا ادق 902 ولا اقدر اكلم موظف ولا شي ...مدري وش فيهم مدري يعني ناموا ولا كيف...

نبي نعرف سالفه 350 هذي ...هل ادفعها مع مكالماتي ولا كيف ولا بس ندفع 350 ....

[DR.SIM]

اهلين ملكة الانوثه



اولا الحمد لله اني شفت الموضوع قبل HGSU0188 :p:p


ذبحنا تقل ما احد يعرف يخدم الاعضاء الا هو :26:

ثانيا شكرا لثقتك فينا وطرحك لاستفساراتك لنا


باقة زيرو بلس


هي باقة بدون رسوم شبكة ... فقط تنحسب عليك قيمة استخدامك من مكالمات او رسايل او نت او الخدمات الاخرى اللي ينحسب عليها رسوم ((( غير خدمة صدى وخدمة موجود اكسترا وخدمة الثلاث قنوات التلفزيونيه المجانيه ))) مع العلم ان الدقيقة داخل الشبكة الاتصالات السعودية فقط ب25هلله والدقيقة خارج الشبكة (( موبايلي )) فقط ب30هلله

بشرط ان يكون اقل ما يدفع في الشهرين هو 700 ريال


مثلا

لو كان مجموع استهلاكك في الشهرين 600 ريال .. فيجب دفع 700 ريال

ولو كان مجموع استهلاكك في الشهرين 800 ريال تدفعين 800 ريال بدون رسوم اضافيه كما هو الحاصل في الباقات القديمه والتي بها رسوم شهرية


بالنسبه لحالتك وتغييرك للباقة

فان المكالمات الغير مفوترة سوف تحتسب عليك بتكلفة الدقيقة لباقة زيرو بلس

وليس بقيمة باقتك السابقه

هذا اولا ... وثانيا انتي دفعتي قيمة رسوم الشبكة شهرين مقدما ... وبما انك غيرتي الباقة .. راح تدفعين رسوم الشبكة لين اليوم اللي غيرتي فيه الباقة .. والباقي راح يرجعونه لك بالفاتورة





اتمنى ان يكون الشرح واضح ... مع ان اسلوبي تعباااااااااان بالكتابه :95:


الله ما عطاني ما عطى الدكتور :62:>> صككه بعييين





وفي الختام في امرين ابيك تنتبهين لهما>> عجبتني لهما .. احس اني الدكتور


هل هذه الباقة مناسبة لك ولاستخدامك؟؟ ... يعني لازم تشوفين اول استهلاكك السابق وتقيسين عليه .. وبعد لازم تطلبين الخدمات المجانيه لباقة بلس لانها ما تنضاف لحالها


وطبعا انتي عارفه طريقتنا هنا ... اذا حبيتي اننا نشوف لك هذه الامور ... فتفضلي مشكورة بارسال رقمك برسالة خاصه وانا راح اشوف وش العروض اللي ممكن تستفيدين منها واقول لك عليها قبل ما انفذها طبعا


وترى 902 حبوبين الله يعطيهم العافيه بس 18 مليون مشترك مو قليل والتاخير دائما يحصل لان الكل يبي يعرف ويسال عن الخدمة الجديده والموظف يشرح له بالتفصيل عشان المشترك ما يفهم غلط ويطلب الخدمه وتطلع ما تنفع له ويزعل العميل


وكل شي ولا زعل العميل (((( والا لا الدكتور )))


وبعدين ترى بنزعل منك ومن اي عضو اذا اتصل على 902


حنا هنا في خدمتكم ... ويعلم الله انا عن نفسي ما سجلت هنا الا لسببين


الاول دعوة الدكتور اللي فعلا نحترمه ونقدره كشخص وكمفكر (( مع انه نحيس للحين ما كتب شي جديد لنا ))

والثاني اني اخدمكم وافيدكم مثل ما تفيدوني بمواضيعكم الحلوه والمفيده فعلا


وشكرا لك




تحياتي لك >> صدّق انه الدكتور:95:

[hgsu0188]

اشهدوا يا جماعه :92:


شفتوا من اللي يتحرش ؟؟؟



بس مووووت حرررررررره Dr.sim :59:


انا نفذت طلبين للاعضاء وانت بس رديت على استفسار :08:




واصلا انا زعلان على الاخت ملكة الانوثه لانها اتصلت على 902 وهي من كبار أعضاء منتدانا :26:


اصلا انا بكووك الدكتور انه يعمم على 902 ما يردون على اتصالات اعضاء المنتدى عشان حنا نتشرف بخدمتهم :59:


بس اعرف الدكتور ما يرضى يزعل الاعضاء :92:


:29:

وبعدين انا اعرف ليه تبي الدكتور يكتب مواضيع جديده


عشان تروح ترزز فيها في المنتديات الثانيه :54:



بس ما يمديك ... اصلا مواضيع الدكتور تبين انها له ... ما تركب عليك


اجل في احد يقول (( امرين ابيك تنتبهين لهما )) :39:



يعني انك تتكلم فصحى يالدوووب :12:

تعلم تعلم .. يقولون بالفصحى (( شيين اريدك ان تتـــنبهي لكليهما )) :37:


وبعدين الدكتور ما يقول تحياتي لك

يقول

تحياتي لك

بالاحمر لانها بصيغة المؤنث .... حتى التذكير والتأنيث ما يعرفها



:59::59:


تحياتي لكم >> بالاسود لانها بصيغة الجمع :44:

[الدكتور]

الله يعطيك العافيه ملكة الانوثة



وحياك الله في منتداك دائما



ونسعد بخدمتك وخدمة اصدقائنا جميعا



تحياتي لك

[الدكتور]

الله يعطيكم العافيه


hgsu0188 Vs Dr.sim


هههههههههههههههههههههههههههههههههههههههههههههههه


يا حلوكم وانتم تتسابقون على خدمة العملاء


والله انكم ترفعون الراس



ابشر Dr.sim احلى مواضيع لعيونك تنزل قريبا وان شاء الله انها تعجبك


بس ترى المزاج الحين مزاج حزن .... يعني زبط وضعك من الحين


برطم عليهم في المنتديات الثانيه :01: عشان يعيشون الجو


hgsu0188 الله لا يحرمنا من ضحكتك ولا من طولة لسانك



الله يبيض وجهكم


فعلا افتخر باني صديق لكم .. وانكم اخوان لي


تحياتي لكم

[عزيز نفس]

اذا كانت فاتورتك ما توصل 700 ريال

انا ما انصحك بالباقه ابدا

[كيوت2007]

اول شي هذا اول رد لي بعد خمس سنوات من الانقطاع عن المنتديات بس شفت الموضوع وانشديت له ويعطيكم الف عافيه على الردود المقننه

بس بيني وبينكم محد يدري من يخدم المستهلك بين هالشبكات تحس العروض ذي صارت اعلاميه فقط وماندري وش يصير من تحت الطاولات يعني احس الشغله صارت ((صبها واحقنها )) << يمكن محد يفهم الكلمه ذي بس المهم ان الاتصالات هي الرائده من ناحية قوة الشبكه

والله يعين الجميع تحياتي لكم

[الدكتور]

منور صديقنا كيوت

والحمد لله ان عودتك صارت معنا


يقول لك اذا بغيت تحيره خيره

وهذه مشكلتنا ان حنا كعملاء ما نقدر استهلاكنا او احتياجنا لذلك ما نعرف وش اللي يخدمنا اكثر ..لذلك انا اعتقد ان وحده من فوائد هالمنتدى غير شوفة الغالين مثلك اننا نتشاور وش اللي يفيدنا اكثر

[بو عبدالله]

منــتدى جمــيل جدا ً